来源：新民晚报夜光杯
作者：胡展奋
沪语改写：丁一军
播讲：许建忠
文字、语音审核：丁迪蒙
编辑：王乙其
四十几年前头，皖南个老乡手里向常庄有得野猪猡肉卖个。伊个辰光副食品供应紧缺，野猪猡肉作为肉类替补，常庄摆到阿拉个吃饭台子浪，就是呒没一趟是好吃个。
勿管侬多少趟去焯水、黄酒浸过夜，随便侬到南货店去买来八角、桂皮，甚至中药房弄得来最去羊骚臭个白豆蔻、良姜侪呒没啥个用场。总归是香臭交杂，腥气搭仔羊骚臭混勒一道，肉个质地像煞是柴爿，皮肤搭坏脱个皮革一样，因此，就发誓再也勿碰野猪猡肉了。
但是，勒温哥华，小学同学达峰完全勿同意我个讲法。伊讲，天底下呒没勿可以吃食物，号称“臭霸”个臭鲱鱼、海麻雀侪有人大吃特吃，对侬讲起来是砒霜，对我来讲就是蜜糖，关键是看侬哪能介白相。譬如讲，野猪猡分雌个雄个，雄个勿要去碰，伊是指大个，最大有1000斤个。大个雄猪猡富含雄烯酮，搿种类似麝香能样子个雄性激素是类固醇化合物，又叫猪烯酮，是猪猡个性费洛蒙，大量存在勒雄猪猡个口水当中，玉皇侪除勿脱个。问题是，一百斤左右，刚刚发育个小个猪猡非但勿受搿个限制，伊个雄烯酮勒特殊条件下头还会得转变为特别个香味道，道理类似抹香鲸肠子里向内分泌个龙涎香，刚刚从海里向捞起来臭不可闻，加工之后却是香国顶流，女界恩宠。其次，野猪猡无论雌雄侪有强烈个氨水味道，就是尿臭啦，搿个可以除脱个，但是也必须勒一百斤以下个再可以，现在个人勿懂，野猪猡侪挑大个打，动勿动就是三五百斤，其实拨人家做肥料也勿要。
第二天下半天，问猎人预订个2块“夹心肉”来了。猎人保证是100斤以下个“小阿哥”。之所以讲是“夹心肉”，讲个是野猪猡个“五花肉”比较精瘦，像柴爿，虽然闻一记还是有呛人个腥骚臭，甚至比皖南个还要腥、臭，但是达峰却邪气个自信个搭我打赌：侬手浪向“陀飞轮”个上海牌手表，代表阿拉上海，我倒是蛮欢喜个，假使我烧得好吃，侬就脱拨我！当然假使难吃，侬来温哥华个单程机票算我个。
我看牢伊切块之后用白醋、盐水、姜水挨一挨二浸泡仔3个钟头，天开始暗下来了，再用冷水加热之后焯水，既勿用八角、桂皮，也勿用豆蔻、丁香，居然拿出来两包华人超市买个鉴湖牌绍兴梅干菜，讲：“出口个，绝对正宗！”“就搿个？”我想笑。我勿就是绍兴人吗？一眼眼个梅干菜哪能代替“香霸”白豆蔻之流呢。伊勿睬我。梅干菜稍微汏个汏，绞干，肉块也勿煸炒，直接摆到砂锅里，每一层肉浪压一层干菜，肉搭仔菜相互叠勒一道，梅干菜个量，黑压压几倍于常规，菜搭仔肉相隔四层，最高一层摆屋里向个猪油一块，再加300克黄酒，生抽、老抽各一眼眼，整块黄冰糖150克，摆勒蒸笼里向，大火烧开，小火焖过夜。
差勿多每个人侪讲焖个辰光忒长了伐。达峰还常怕辰光勿够，要晓得，搿是野猪猡个肉，伊讲，非要出重手勿可。就好像捆绑吕布，吕布喊紧，曹操骂伊“绑老虎哪能可以勿紧！”
当天夜里呒啥事体。睏梦头里隐隐约约个传过来家乡个梅干菜香。等到天色完全亮了，满房间个人竟然侪被熏醒了——搿是啥物事，介香啦？！
搿种香，既熟悉又陌生，是绍兴梅干菜香为基本盘个“如麝如兰，似桂似檀”，是南唐鹅梨冰瑞脑？是云母屏风沉水香？侪是，又侪勿是，是农家粗菜个朴质、老实加持勒皇家仿膳个荣华富贵伐。
开吃。朋友得意个拿蒸笼开开来，周围个人马上开始深呼吸，大概野猪猡个性费洛蒙搭梅干菜个山野酵素相互滲透，所谓杂交优势而酿成最浓郁个肉香，一块吃进嘴巴里向，万夫莫当，酥得来像热个栗子，肥得像煞是肥肠，一句闲话，天上人间。
我吃到第三块，就自觉个拿手表脱下来，讲，朋友，拿去！有空到上海来露一手伐。
作者：胡展奋
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《上海话读成语故事》少年儿童出版社
《囡囡学童谣》，少年儿童出版社
《囡囡学成语》，少年儿童出版社
原标题：《沪语：干菜野猪肉》
阅读原文